logo

ຫ້ອງການ ສນຍ ໄດ້ຮັບເງິນບໍລິຈາກເພື່ອ ຊ່ວຍເຫຼືອຜູ້ປະສົບໄພນ້ຳຖ້ວມ

ໃນຕອນແລງ ຂອງວັນທີ 11/09/2019 ທີ່ ຫ້ອງວ່າການສຳນັກງານນາຍົກລັດຖະມົນຕີ (ສນຍ) ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕ່າງໜ້າໃຫ້ລັດຖະບານ ຮັບເງິນຈາກກຸ່ມ ບໍລິສັດ ກຣິດຕະພົງ ຈຳກັດ ຈຳນວນ 100,000,000 ກີບ ເພື່ອໄປຊ່ວຍເຫຼືອຜູ້ປະ ສົບໄພນໍ້າຖ້ວມ. ພິທີມອບຮັບເງິນຈໍານວນດັ່ງກ່າວໄດ້ຈັດຂຶ້ນຢູ່ສໍານັກງານນາຍົກລັດຖະມົນຕີ ໂດຍແມ່ນ ທ່ານ ນາງ ອໍລະໄທ ສັນຕິຄົງຄາ, ຜູ້ອຳນວຍການໃຫຍ່ ບໍລິສັດດັ່ງກ່າວ ເປັນຜູ້ມອບ ແລະ ມີພະນັກງານ ທີ່ກ່ຽວຂ້ອງຂອງຫ້ອງການ ສນຍ ແລະ ບໍລິສັດ ດັ່ງກ່າວເຂົ້າຮ່ວມເປັນສັກຂີພິຍານ.
ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈຕໍ່ບໍລິສັດ ທີ່ໄດ້ນຳ ເອົາເງິນມາມອບໃຫ້ເພື່ອນໍາໄປຊ່ວຍເຫຼືອຜູ້ປະ ສົບໄພນໍ້າຖ້ວມໃນຄັ້ງນີ້. ເງິນຊ່ວຍເຫຼືອດັ່ງກ່າວ ຈະໄດ້ນຳໄປມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍ ເຫຼືອຜູ້ປະສົບໄພນໍ້າຖ້ວມໃນປີນີ້. ການຊ່ວຍເຫຼືອຂອງ ກຸ່ມບໍລິສັດ ກຣິດຕະພົງ ຈຳກັດ ຈະເປັນສ່ວນໜຶ່ງ ໃນການປະກອບ ສ່ວນເຮັດໃຫ້ການແກ້ໄຂໄພພິບັດກໍ່ຄືຜົນກະທົບ ຕໍ່ຊີວິດການເປັນຢູ່ຂອງ ປະຊາຊົນ ທີ່ໄດ້ພົບປະ ສົບໄພນໍ້າຖ້ວມຢູ່ທ້ອງຖິ່ນຕ່າງໆ ໃນຂອບເຂດ ທົ່ວປະເທດ.
ພາບ-ຂ່າວ: ຫ້ອງການ ສນຍ