logo

ທົ່ງໄຫຫີນ ແຂວງຊຽງຂວາງໄດ້ຖືກຮັບຮອງເຂົ້າເປັນມໍລະດົກໂລກຢ່າງເປັນທາງການແລ້ວ

ອີງຕາມຂໍ້ມູນຈາກກົມມໍລະດົກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນຕອນເຊົ້າມື້ນີ້ 06/07/2019 ວ່າ ກອງປະຊຸມຄະນະກຳມະການມໍລະດົກໂລກ ຄັ້ງທີ 43 ທີ່ບາກູ, ປະເທດອາແຊັກບາຍຊານ ໄດ້ປະກາດຮັບຮອງເອົາແຫຼ່ງທ່ອງທ່ຽວຂອງລາວ ທົ່ງໄຫຫີນ ທີ່ແຂວງຊຽງຂວາງເຂົ້າໃນບັນຊີເປັນມໍລະດົກໂລກຢ່າງເປັນທາງການແລ້ວ.
ທ່ານ ທອງໃບ ໂພທິສານ ຫົວໜ້າກົມມໍລະດົກ ໄດ້ກ່າວຜ່ານສື່ສັງຄົມອອນລາຍວ່າ ມື້ນີ້ ເປັນອີກມື້ໜຶ່ງທີ່ເປັນຄວາມພາກພູມໃຈຂອງປະຊາຊົນລາວໝົດທຸກຄົນ ໂດຍສະເພາະ ພີ່ນ້ອງຊາວຊຽງຂວາງ ທີ່ສົມຫວັງກັບການຄອງຄອຍມາເປັນເວລາຍາວນານກວ່າ 20 ປີ, ມື້ນີ້ຄວາມຝັນນັ້ນໄດ້ກາຍມາເປັນຄວາມຈິງ ເມື່ອ ອົງການອຸຍແນັດສະໂກ ປະກາດຮັບຮອງເອົາແຫຼ່ງທ່ອງທ່ຽວຂອງລາວ ທົ່ງໄຫຫີນ ທີ່ແຂວງຊຽງຂວາງເຂົ້າໃນບັນຊີເປັນມໍລະດົກໂລກຢ່າງເປັນທາງການ. ສະນັ້ນປະຊາຊົນລາວທຸກຄົນ ກຽມສະເຫຼີມສະຫຼອງໄດ້ເລີຍ.
ທົ່ງໄຫຫີນ ທີ່ແຂວງຊຽງຂວາງຖືວ່າເປັນແຫຼ່ງທ່ອງທ່ຽວມໍລະດົກໂລກ ແຫ່ງທີສາມ ຂອງ ສປປລາວ ພາຍຫຼັງທີ່ ແຂວງຫຼວງພະບາງ ແລະ ວັດພູແຂວງຈຳປາສັກໄດ້ຖືກຮັບຮອງເອົາ ຈາກອົງການອຸຍແນັດສະໂກ UNESCO ເມື່ອຫຼາຍປີກ່ອນ.
ຂ່າວ: ສຸກນີລັນດອນ
ພາບ: ສາລາກະວີ ງົວແລະກວຽນ